by
کراچی (ڈیلی پاکستان آن لائن) پیپلزپارٹی کے چیئرمین اور سابق وزیر خارجہ بلاول بھٹو زرداری کاکہنا ہے کہ کنگز پارٹی کا وہی حال ہوگا جو 2008 میں ہم نے کیا تھا، اس طرح کی جماعتوں کو بنانے سے عوام اور سیاسی حلقوں میں غلط پیغام جاتا ہے۔
میڈیا سے گفتگو کرتے ہوئے بلاول بھٹو کا کہنا تھا کہ کنگز پارٹی ہر الیکشن میں کسی نہ کسی صورت میں سامنے آتی ہے، ، ہم تین نسلوں سے جدوجہد کر رہے ہیں ہمارا مقصد ہے کہ ادارے اپنی حدود میں کام کریں، شہباز شریف کو وزیراعظم بنانے میں ہم نے بہت محنت کی، وہ وقت کی ضرورت تھی اور وقت کی ضرورت کیلئے بہت کچھ کرنا پڑتا ہے، 2013 اور 2018 کے بعد ہم اپوزیشن میں تھے، ہمارے وسائل چھینے جا رہے تھے دھمکیاں دی جاتی تھیں۔ بلاول بھٹو نے مزید کہا کہ مولانا فضل الرحمان کی سیاست سندھ، بلوچستان اور کے پی میں بھی ہے ان سے رابطہ رہے گا، جو مشکل وقت میں اپنی جماعت کے ساتھ کھڑے نہ ہو سکے الیکشن میں ان کو مشکل کا سامنا کرنا ہوگا۔انہوں نے کہا کہ جنرل باجوہ نے ہمیں بلایا تھا اور کہا کہ اپنا عدم اعتماد واپس لیں ہم الیکشن کرواتے ہیں، ہم اپوزیشن میں ہوں یا حکومت میں سیاسی لحاظ سے چلانا چاہتے ہیں۔
