by
لاہور ( ڈیلی پاکستان آن لائن ) چودھری نثار کے حلقے سے مسلم لیگ (ن) اپنا امیدوار کھڑا کرے گی یا نہیں ؟ اس حوالے سے سابق وفاقی وزیر رانا ثناء اللہ نے واضح الفاظ میں بتا دیا ۔لاہور میں میڈیا سے گفتگو کرتے ہوئےمسلم لیگ (ن )پنجاب کے صدر رانا ثناء اللّٰہ نے کہا ہے کہ( ن) لیگ چوہدری نثار کے حلقے سے اپنا امیدوار ضرور کھڑا کرے گی۔ 21 اکتوبر کو نواز شریف نے قوم کو نئی امید دلائی، ہم انتخابی سرگرمیوں کا آغاز کر چکے ہیں، نواز شریف دوسرے صوبوں کے دوروں کی منصوبہ بندی کر چکے ہیں۔ مسلم لیگ( ن) نے پہلے بھی نواز شریف کی قیادت میں ملک کو ایسے بحرانوں سے نکالا، کہا جاتا تھا کہ ہم مینارِ پاکستان نہیں بھر سکتے، ہم نے مینارِ پاکستان ہی نہیں پورا لاہور بھر کے دکھا دیا، 21 اکتوبر کے جلسے میں ملک بھر سے لوگ شریک ہوئے تھے۔ سازش کے تحت 1 شخص کو لانچ کیا گیا تھا، ملک خوش حالی کی طرف بڑھ رہا تھا، اس کی رفتار روک دی گئی، آج عام آدمی کا جینا مشکل نہیں بلکہ ناممکن ہو چکا ہے۔
“جنگ ” کے مطابق رانا ثناء اللّٰہ نے کہا کہ ہمارے رہنماؤں کو جیلوں میں ڈالا گیا اس کے باوجود ہم کھڑے رہے، کیا پنجاب میں قومی اسمبلی کی سب سے بڑی پارٹی( ن) لیگ نہیں تھی؟ 2018ء کے الیکشن میں مشکلات کے باوجود ہم نے کامیابی حاصل کی تھی، ہم ملک اور عوام کو ایک بار پھر بحرانوں سے نکالیں گے۔ نئے پاکستان کا تجربہ ناکام رہا، ایک ایک ڈالر کے لیے آئی ایم ایف کی منتیں کر رہے ہیں۔ اس سے انکار نہیں کہ مہنگائی اس وقت سب سے بڑا چیلنج ہے، دہشت گردی اور لوڈشیڈنگ کی طرح مہنگائی پر بھی قابو پالیں گے۔
ان کا کہنا ہے کہ ہماری انتخابی سرگرمیاں پنجاب سمیت ملک بھر میں جاری ہیں،مسلم لیگ (ن )کا وفد جی ڈی اے اور ایم کیو ایم پاکستان سے مذاکرات کے لیے سندھ میں ہے۔( ن) لیگ کے ناراض اراکین کو منانے میں کامیاب ہو گئے ہیں، سہولت کاری کی بات کی جا رہی ہے، کون سی سہولت کاری؟ ہم ایک ایک سیٹ پر کام کر رہے ہیں۔ ہم وفاق اور پنجاب میں حکومت بنائیں گے، ان شاء اللّٰہ نواز شریف دسمبر میں اپنے جلسوں کا آغاز کریں گے۔
