by
پشاور(ڈیلی پاکستان آن لائن) خیبرپختون خواہ کے نگران وزیراعلیٰ اعظم خان انتقال کر گئےجس کے بعد نگران کابینہ بھی تحلیل ہو گئی ہے ۔
نجی ٹی وی جیونیوز کے مطابق گزشتہ روز وہ گھر میں موجود تھے کہ طبیعت خراب ہونے پر حیات آباد میں نجی ہسپتال منتقل کیا گیا ، انہیں آئی سی یو میں رکھا گیا تھا ۔ وزیراعلیٰ ہائوس کی جانب سے اعظم خان کے انتقال کی تصدیق کر دی گئی ہے ۔اس سے قبل وزیراعلیٰ کی کئی بار طبیعت خراب ہو چکی ہے ، لیکن گزشتہ رات طبیعت زیادہ خراب ہوئی .اعظم خان ہ نگران وفاقی وزیر بھی رہ چکے ہیں ، سات آٹھ ماہ سے نگران وزیراعلیٰ کی خدمات انجام دے رہے تھے ۔محمد اعظم خان کی نماز جنازہ چارسدہ کے علاقے پٹرانگ میں دوپہر تین بجے ادا کی جائے گی ۔
ترجمان آر ایم آئی اسپتال کے مطابق اعظم خان کل رات دل کی تکلیف پر اسپتال لائے گئے۔ ان کی طبیعت رات ہی سے تشویش ناک تھی اور وہ عارضہ قلب میں بھی مبتلا تھے۔
نگراں وزیراعلیٰ کے پی کے محمد اعظم خان ریٹائرڈ بیورو کریٹ تھے جو ماضی میں وزیر خزانہ، وفاقی سیکرٹری وزارت پٹرولیم و قدرتی وسائل اور وفاقی سیکرٹری مذہبی امور بھی رہے ہیں۔ اُن کا تعلق چارسدہ کے پڑانگ علاقے سے تھا اور وہ سابق انسپکٹر جنرل پولیس محمد عباس خان کے بھائی تھے۔
اعظم خان نے ماضی میں چیف سیکرٹری اور مختلف وزارتوں کے سیکرٹری کے طور پر بھی کام کیا۔ انہوں نے پشاور یونیورسٹی سے قانون کی تعلیم حاصل کی، جس کے بعد وہ بار ایٹ لا کی ڈگری مکمل کرنے کے لیے لنکن-ان لندن میں بھی زیرِ تعلیم رہے ہیں۔
نگراں وزیراعلیٰ خیبر پختونخوا کے طور پر محمد اعظم خان کا نام اپوزیشن کی جانب سے پیش کیا گیا تھا، جس پر سابق وزیراعلیٰ محمود خان نے بھی اتفاق کیا تھا۔
